پرەمەر-مينيستر ولجاس بەكتەنوۆتىڭ تاپسىرماسىمەن بايقوڭىر كەشەنىندە ءتۋريزمدى دامىتۋدىڭ 2030 جىلعا دەيىنگى تۇجىرىمداماسى بەكىتىلدى. قۇجات حالىقارالىق دەڭگەيدە باسەكەگە قابىلەتتى تۋريستىك ءونىم قالىپتاستىرۋعا جانە سالانىڭ تۇراقتى دامۋىنا قاجەتتى جاعداي جاساۋعا باعىتتالعان, دەپ جازادى Egemen.kz.
تۇجىرىمدامانى ىسكە اسىرۋ اياسىندا شەتەلدىك تۋريستەر ءۇشىن رۇقسات بەرۋ راسىمدەرى جەڭىلدەتىلدى. قازىر قاجەتتى قۇجاتتاردى راسىمدەۋ مەرزىمى 10 كۇنگە دەيىن قىسقارتىلدى. بۇل كەشەننىڭ شەتەلدىك قوناقتار ءۇشىن قولجەتىمدىلىگىن ارتتىرىپ, عارىش اپپاراتتارىنىڭ ۇشىرىلىمدارىن تاماشالاۋعا ارنالعان تۋريستىك باعدارلامالاردىڭ دامۋىنا سەرپىن بەرەدى.
ءتۋريزمدى دامىتۋعا قازاقستاننىڭ قاراماعىنا بىرقاتار نىساننىڭ بەرىلۋى دە جاڭا مۇمكىندىكتەر اشىپ وتىر. ولاردىڭ قاتارىندا گاگارين ۇشۋ الاڭى, مونتاجداۋ-جانارماي قۇيۋ كەشەنى جانە ديناميكالىق سىناقتار ستەندى بار.
بايقوڭىر عارىش ايلاعىنان جوندەۋ جۇمىستارىنان كەيىن العاش رەت زىمىران ۇشىرىلدى
اتالعان نىسانداردىڭ تۋريستىك الەۋەتى جوعارى. ولار عىلىمعا, تەحنولوگياعا جانە عارىش تاريحىنا قىزىعاتىن الەمنىڭ تۇكپىر-تۇكپىرىنەن كەلەتىن ساياحاتشىلار ءۇشىن ماڭىزدى تارتىمدىلىق ورتالىعىنا اينالا الادى.
قازىرگى ۋاقىتتا نىسانداردى جاڭعىرتۋعا جانە زاماناۋي تۋريستىك ينفراقۇرىلىم قالىپتاستىرۋعا مۇددەلى ينۆەستورلارعا ارنالعان ينۆەستيتسيالىق ۇسىنىستار ازىرلەنگەن.
سونداي-اق ۇشىرىلىمدار اراسىنداعى كەزەڭدە وقيعالى ءتۋريزمدى دامىتۋعا ەرەكشە نازار اۋدارىلىپ وتىر. بۇل باستاما جىل بويى تۇراقتى تۋريستىك اعىن قالىپتاستىرۋعا جانە كەشەننىڭ قولدانىستاعى ينفراقۇرىلىمىن ءتيىمدى پايدالانۋعا مۇمكىندىك بەرەدى.
تاريحي وقيعا: بايقوڭىردان «سويۋز-5/سۇڭقار» پەرسپەكتيۆتى زىمىران-تاسىعىشى ءساتتى ۇشىرىلدى
بايقوڭىردى الەمدىك دەڭگەيدەگى تۋريستىك ورتالىق رەتىندە دامىتۋ – تۋريزم سالاسىن ءارتاراپتاندىرۋدىڭ ماڭىزدى باعىتتارىنىڭ ءبىرى. بۇل قازاقستاننىڭ حالىقارالىق تۋريستىك نارىقتاعى ۇستانىمىن نىعايتىپ, ەلدىڭ تۋريستىك تارتىمدىلىعىن ارتتىرۋعا ىقپال ەتەدى.
ايتا كەتەيىك, مەملەكەت باسشىسى بىلتىر رەسەيگە ساپارى كەزىندە «روسسيسكايا گازەتا» باسىلىمىنداعى ماقالاسىندا «بايقوڭىر» عارىش ايلاعىن «الەمدىك كوسموناۆتيكانىڭ التىن بەسىگى» دەپ اتاپ وتكەن بولاتىن.