الماتىلىق وقۋشىلار دەنە شىنىقتىرۋ ساباعىن ەندى Almaty SuperSki كۋرورتىنىڭ اۋماعىندا وتەدى. بۇل تۋرالى ۇكىمەت وتىرىسىندا Kazakh Tourism Development LTD كومپانياسىنىڭ باس ديرەكتورى ەرجان ەركىنباەۆ مالىمدەدى, دەپ حابارلايدى Egemen.kz.
ونىڭ ايتۋىنشا, جاڭا تاۋ كۋرورتىندا جالپى ۇزىندىعى 60 شاقىرىم بولاتىن تاۋ-شاڭعى تراسسالارى سالىنادى. كۋرورت كۇنىنە 10 مىڭنان استام شاڭعىشىنى قابىلداي الادى. تراسسالاردىڭ 70 پايىزى جاسىل جانە كوك ساناتقا جاتادى, ياعني بالالار مەن شاڭعى سپورتىمەن ەندى اينالىسا باستاعاندارعا قولايلى بولادى.
«جوبا اياسىندا الماتى قالاسىنىڭ اكىمدىگىمەن بىرلەسىپ, بولاشاق كۋرورت اۋماعىندا مەكتەپ وقۋشىلارىنا ارنالعان دەنە شىنىقتىرۋ ساباقتارىن وتكىزۋ ماسەلەسى قاراستىرىلىپ جاتىر. بۇل تاجىريبە ەۋروپانىڭ بىرقاتار ەلىندە كەڭىنەن قولدانىلادى. ماسەلەن, اۋستريادا جىل سايىن 80 مىڭنان استام وقۋشى مەكتەپ باعدارلاماسى اياسىندا شاڭعى سپورتىمەن اينالىسسا, شۆەيتساريادا 128 مىڭنان استام بالا قىسقى سپورتتىق-ساۋىقتىرۋ باعدارلامالارىنا قاتىسادى. فرانتسيا مەن يتاليادا مەكتەپ وقۋشىلارىنىڭ تاۋ شاڭعىسى كۋرورتتارىنا بارۋىن قولدايتىن مەملەكەتتىك باعدارلامالار جۇزەگە اسىرىلادى», دەدى ەرجان ەركىنباەۆ.
ءتۋريزمنىڭ ەل ەكونوميكاسىنا قوسقان ۇلەسى 5 ترلن تەڭگەگە جەتتى
بولاشاقتا كۋرورت اۋماعىندا 11 زاماناۋي اسپالى جول سالىنباق. سول ارقىلى كەلۋشىلەر مەدەۋ ستانساسىنان قۇمبەل شىڭىنا دەيىن ەش كەدەرگىسىز جەتە الادى. كومپانيا باسشىنىڭ ايتۋىنشا, اسپالى جولداردىڭ قىزمەتىن زەينەتكەرلەر, بالالار جانە مۇمكىندىگى شەكتەۋلى جاندار ءۇشىن تەگىن ەتۋ جوسپارلانىپ وتىر.
ايتا كەتەيىك, Almaty SuperSki كۋرورتى 2028 جىلدىڭ سوڭىندا پايدالانۋعا بەرىلمەك. بۇعان دەيىن جوباعا قاتىستى الماتى قالاسىندا قوعامدىق تىڭدالىم ءوتىپ, تۋريستىك باستاما كاسىپكەرلەر, ساراپشىلار مەن تۇرعىندار تاراپىنان قولداۋ تاپقان بولاتىن.