استانادا 29 شىلدە مەن 9 تامىز ارالىعىندا «بولاشاق ويىندارى» حالىقارالىق ءتۋرنيرى وتەدى. بۇل تۋرالى ۇكىمەت وتىرىسىندا تۋريزم جانە سپورت ءمينيسترى ەربول مىرزابوسىنوۆ مالىمدەدى, دەپ حابارلايدى Egemen.kz.
تۋرنيرگە الەمنىڭ 50-دەن استام ەلىنەن 900-گە جۋىق سپورتشى, حالىقارالىق سپورت ۇيىمدارى مەن تسيفرلىق يندۋستريانىڭ, بۇقارالىق اقپارات قۇرالدارىنىڭ وكىلدەرى قاتىسادى دەپ كۇتىلىپ وتىر.
جارىسقا قاتىسۋشىلار كلاسسيكالىق سپورت پەن كيبەرسپورتتى بىرىكتىرەتىن 8 ءپان بويىنشا باس سىنايدى. مۋلتيسپورت باعدارلاماسىنا فيدجيتال-فۋتبول, فيدجيتال-باسكەتبول, فيدجيتال-اتقىشتار, فيدجيتال-جەكپە-جەك, فيدجيتال-بي, Battle Royale, سونداي-اق كومپيۋتەرلەر مەن ءموبيلدى قۇرىلعىلارعا ارنالعان MOBA ويىندارى ەنگىزىلگەن.
«بولاشاق ويىندارى-2026» ءتۋرنيرى قاشان وتەدى؟
تۋرنير قارساڭىندا تۋروپەراتورلار ارنايى تۋريستىك پاكەتتەر ازىرلەگەن. بۇل قاتىسۋشىلارعا استانانىڭ مادەني جانە تۋريستىك كورىكتى ورىندارىن ارالاۋعا مۇمكىندىك بەرەدى. حالىقارالىق جارىس ەلوردانىڭ ءتورت سپورت نىسانىندا وتەدى.
ەسكە سالا كەتەيىك, بۇعان دەيىن استانادا PGL Astana 2026 حالىقارالىق ءتۋرنيرى وتكەن بولاتىن. جارىسقا الەمدىك دەڭگەيدەگى 16 كوماندا قاتىسىپ, كيبەرسپورت تۇرلەرىنەن باق سىنادى.