بۇگىندە ءبىلىم بەرۋ سالاسى اۋقىمدى تسيفرلىق ترانسفورماتسيا كەزەڭىن باستان وتكەرىپ جاتىر. ونلاين وقىتۋ, تسيفرلىق پلاتفورمالار مەن جاساندى ينتەللەكت ءبىلىم بەرۋ ۇدەرىسىنىڭ اجىراماس بولىگىنە اينالدى.
سوعان قاراماستان, ونلاين ءبىلىم بەرۋ سالاسى بىرقاتار قيىندىققا تاپ بولىپ وتىر. كوپتەگەن وقۋ ورىندارىندا بەينەساباقتار قاراپايىم ۆەب-كامەرالار ارقىلى جازىلادى. جارىق پەن دىبىس ساپاسىنىڭ تومەن بولۋى اقپاراتتى قابىلداۋدى قيىنداتىپ, وقۋشىلاردىڭ قىزىعۋشىلىعىن ازايتادى. كاسىبي بەينەكۋرستار جاساۋ ءۇشىن وپەراتورلار, مونتاج ماماندارى مەن ديزاينەرلەردى تارتۋ قاجەتتىلىگى شىعىندى ارتتىرادى.
زاماناۋي ءبىلىم بەرۋدەگى وسىنداي وزەكتى ماسەلەلەر «بولاشاق» تۇلەگى ولجاس ومىرسەرىكتىڭ EdMedia كومپانياسىن قۇرۋعا تۇرتكى بولعان. بۇگىندە EdMedia ينتەراكتيۆتى ۆيدەوستۋدياسى ءبىلىم بەرۋ ۇيىمدارىنا زاماناۋي كونتەنتتى دايىنداۋعا كومەكتەسىپ, مىڭنان استام كورەرمەنگە تىكەلەي ەفيرلەر وتكىزۋگە مۇمكىندىك بەرەدى. ستۋديادا ينتەراكتيۆتى بەينەساباقتاردى جازۋعا, تسيفرلىق كۋرستار مەن پرەزەنتاتسيالار ازىرلەۋگە, 3D مودەلدەۋگە, تەلەسۋفلەر قولدانۋعا, ءبىلىم بەرۋ پودكاستتارىن جاساۋعا, جاساندى ينتەللەكت قۇرالدارىن پايدالانۋعا بولادى. وسىنىڭ ارقاسىندا وقىتۋشىلار تەحنيكا ءتىلىن مەڭگەرگەن كاسىبي ماماندارسىز-اق ساپالى كونتەنت دايىنداي الادى.
2014 جىلدان باستاپ جۇمىس ىستەپ كەلە جاتقان كومپانيا سوڭعى بەس جىلدىڭ وزىندە 100-دەن استام مەكتەپ, كوللەدج, اكادەميا مەن ۋنيۆەرسيتەتكە ءوز جۇيەلەرىن ورناتىپ ۇلگەرگەن.
«2014 جىلى «بولاشاق» حالىقارالىق باعدارلاماسىنىڭ اياسىندا ۇلىبريتانيادا ماركەتينگ جانە بيزنەس مەنەدجمەنتى باعىتىندا ءبىلىم الدىم. سول كەزەڭدە ءبىلىم بەرۋ ءداستۇرلى مودەلدەن زاماناۋي, يكەمدى جانە ستۋدەنتتىڭ قاجەتتىلىكتەرىنە بەيىمدەلگەن فورماتقا اۋىسا باستاعان ەدى. بۇل تاجىريبە مەنىڭ تەحنولوگيالار مەن ءبىلىم بەرۋ سالاسىن بىرىكتىرەتىن جوبالارعا دەگەن قىزىعۋشىلىعىمدى ارتتىردى. قازاقستانعا ورالعاننان كەيىن ءبىزدىڭ العاشقى جوبامىز جوعارى وقۋ ورىندارىنا ارنالعان كۋرستىق جانە ديپلومدىق جۇمىستاردى اۆتوماتتى تۇردە تەكسەرۋ جۇيەسىن ازىرلەۋ بولدى. الايدا جوبانى ىسكە اسىرۋ بارىسىندا نارىقتاعى قولدانىستاعى شەشىمدەردىڭ كوپشىلىگى جەرگىلىكتى تالاپتار مەن ءبىلىم بەرۋ جۇيەسىنىڭ ەرەكشەلىكتەرىنە تولىق سايكەس كەلمەيتىنىن انىقتادىق. وسىعان بايلانىستى ءبىز قازاقستان نارىعىنا ارنايى بەيىمدەلگەن, ءوزىمىزدىڭ تەحنولوگيالىق پلاتفورمامىزدى ازىرلەۋگە شەشىم قابىلدادىق», دەيدى جوبا اۆتورى ولجاس ومىرسەرىك.
قاتەرلى ىسىكتى انىقتاۋعا بەس سۋرەت جەتكىلىكتى: جاس عالىم ازىرلەگەن الگوريتمنىڭ ەرەكشەلىگى قانداي؟
وسىلايشا ينتەراكتيۆتى پانەلدەر مەن جاساندى ينتەللەكت ەلەمەنتتەرىن جانە تسيفرلىق كونتەنت ازىرلەۋ قۇرالدارىن بىرىكتىرەتىن كەشەندى ەكوجۇيە قۇرىلدى. الايدا جوبا اۆتورىنىڭ ايتۋىنشا, تسيفرلىق ءبىلىم بەرۋ ۇدەرىسىنە جاسالعان ترانسفورماتسيالىق قادام العاشىندا ايتارلىقتاي قولداۋ تابا قويماعان.
«ەڭ ۇلكەن قيىندىقتاردىڭ ءبىرى – جاڭا تەحنولوگيانىڭ قۇندىلىعىن ءتۇسىندىرۋ بولدى. باستاپقى كەزەڭدە كوپتەگەن ۇيىمدار ءداستۇرلى وقىتۋ فورماتىنا ۇيرەنگەن ەدى. سوندىقتان بىزگە تەك ءونىمدى كورسەتۋ ەمەس, وقىتۋ ءتاسىلىنىڭ ءوزى وزگەرىپ جاتقانىن دالەلدەۋ قاجەت بولدى. تاعى ءبىر ماڭىزدى ماسەلە – يمپورتتىق شەشىمدەردىڭ جەرگىلىكتى نارىققا سايكەس كەلمەۋى. شەتەلدىك جۇيەلەردى قايتا بەيىمدەۋ ۋاقىتتى ۇزارتتى جانە تيىمدىلىكتى تومەندەتتى. وسى سەبەپتى ءبىز تولىقتاي وتاندىق ءونىم ازىرلەۋگە شەشىم قابىلدادىق. بۇگىندە بۇل شەشىم ءوزىنىڭ تيىمدىلىگىن دالەلدەدى. قازاقستان تسيفرلىق ءبىلىم بەرۋ باعىتىندا ايتارلىقتاي پروگرەسس كورسەتىپ كەلەدى. ەگەر بۇرىن ونلاين وقىتۋ تەك ءداستۇرلى اۋديتوريانى Zoom فورماتىنا كوشىرۋمەن شەكتەلسە, قازىر ءبىلىم بەرۋ كونتەنتىنىڭ ساپاسىنا, ۆيزۋاليزاتسياعا جانە ينتەراكتيۆتىلىككە ۇلكەن كوڭىل ءبولىنىپ وتىر. بۇگىنگى ستۋدەنت جاي اقپاراتتى ەمەس, قىزىقتى ءارى ديناميكالىق فورماتتاعى ءبىلىمدى كۇتەدى. مۇنىڭ ناتيجەسىن حالىقارالىق كورسەتكىشتەردەن دە كورۋگە بولادى. Coursera پلاتفورماسىنىڭ دەرەكتەرىنە سايكەس, قازاقستان ونلاين وقۋعا قاتىسۋ دەڭگەيى بويىنشا الەمنىڭ 109 ەلى اراسىندا 18-ورىنعا كوتەرىلدى», دەيدى جوبا اۆتورى.
ونىڭ ايتۋىنشا, ينتەراكتيۆتى ۆيدەوستۋديانى ەنگىزۋ ءبىلىم بەرۋ ساپاسىن ارتتىرىپ قانا قويماي, تسيفرلىق ورتانى دامىتۋعا مۇمكىندىك بەرەدى. مۇنداعى كاسىبي جارىقتاندىرۋ, ساپالى دىبىس جانە زاماناۋي جازۋ تەحنولوگيالارى بەينەساباقتاردى تارتىمدى ءارى تۇسىنىكتى ەتەدى. ساباقتارعا تەستتەر, ۆيكتورينالار, سىلتەمەلەر, سۋرەتتەر, 3D نىساندار جانە قوسىمشا تاپسىرمالار ەنگىزۋگە بولادى. تەلەسۋفلەر, دايىن شابلوندار جانە زاماناۋي قۇرالدار ساباققا دايىندىق ۋاقىتىن ايتارلىقتاي قىسقارتادى.
ء«بىز قازىردىڭ وزىندە AI تەحنولوگيالارىن ونىمدەرىمىزگە ەنگىزۋدى باستاپ كەتتىك. بولاشاقتا ولار وقۋ ماتەريالدارىن دايىنداۋعا كومەكتەسىپ, دايىن ساباقتاردى اۆتوماتتى تۇردە قۇراستىراتىن بولادى. كونتەنتتى ءتۇرلى تىلدەرگە اۆتوماتتى تۇردە اۋدارىپ, ستۋدەنتتەردىڭ بەلسەندىلىگى مەن وقۋ تيىمدىلىگىن تالدايدى. ءار وقۋشى ءۇشىن جەكە بەيىمدەلگەن وقۋ ستسەناريلەرىن جاساۋعا مۇمكىندىك بەرەدى», دەيدى كاسىپكەر.
ورالدىق وقۋشىلار قانت ديابەتىنىڭ مولشەرىن تەكسەرەتىن قۇرىلعى ويلاپ تاپتى
ساراپشىلار قازىردىڭ وزىندە جاساندى ينتەللەكت ءبىلىم بەرۋ جۇيەسىنىڭ ماڭىزدى بولىگىنە اينالىپ كەلە جاتقاندىعىن ايتىپ كەلەدى. سول سەبەپتى جوبا اۆتورى بۇل باعىتتاعى جۇمىستاردى ارمەن قاراي جەتىلدىرە تۇسۋگە نيەتتى ەكەندىگىن جەتكىزدى.