«قازاق گازەتتەرى» سەرىكتەستىگىندە «Egemen Qazaqstan» رەسپۋبليكالىق گازەتىنىڭ باس رەداكتورى, بەلگىلى جۋرناليست عابيت ىسكەندەر ۇلى مۇسىرەپتىڭ 60 جاسقا تولعان مەرەيلى بەلەسىنە ارنالعان ءىس-شارا ءوتتى. سەرىكتەستىكتىڭ باس ديرەكتورى ديحان قامزابەك ۇلىنىڭ توراعالىعىمەن وتكەن القالى جيىنعا پرەزيدەنت كەڭەسشىسى باۋىرجان وماروۆ پەن سىرتقى ىستەر ءمينيسترىنىڭ كەڭەسشىسى قۋات بوراش, سونداي-اق باس باسىلىمنىڭ ۇجىمى قاتىستى.
الپىسىنا ابىروي-بەدەلىمەن جەتكەن عابيت ىسكەندەر ۇلىنىڭ ەسىمى ەل باسشىلىعى تاراپىنان ەرەكشە ەلەندى. بۇعان وسى باسقوسۋدا جاريا بولعان مارتەبەسى بيىك قۇتتىقتاۋ حاتتارى دالەل بولا الادى. الدىمەن اكادەميك باۋىرجان وماروۆ مەملەكەت باسشىسى قاسىم-جومارت توقاەۆتىڭ قۇتتىقتاۋىن وقىپ بەرىپ, سالتاناتتى تۇردە تابىستادى. پرەزيدەنت حاتىندا مەرەيتوي يەسىنىڭ وتاندىق مەديا سالاسىن زامان تالابىنا ساي دامىتۋداعى ورنى ايرىقشا اتالىپ وتكەن.
«بەلگىلى جۋرناليست, بىلىكتى باسشى, ۇلتجاندى ازامات رەتىندە كوپ جىل بويى رەسپۋبليكالىق باسىلىمدا جەمىستى جۇمىس ىستەپ, وتاندىق مەديا سالاسىنىڭ زامان تالابىنا ساي دامۋىنا مول ۇلەس قوسىپ كەلەسىز. بۇگىندە «Egemen Qazaqstan» گازەتىنىڭ بەدەلىن ارتتىرۋ جولىندا قاجىرلى ەڭبەك ەتىپ ءجۇرسىز. مەملەكەتتىك ساياسات, زاڭ مەن ەكونوميكا, ءبىلىم جانە عىلىم تاقىرىپتارىن ارقاۋ ەتكەن سالماقتى ساراپتامالارىڭىز بەن ماعىنالى ماقالالارىڭىزدى قالىڭ وقىرمان قاۋىمى زور قىزىعۋشىلىقپەن وقيدى. الداعى ۋاقىتتا دا ەلىمىزدىڭ رۋحاني-مادەني دامۋىنا اتسالىسىپ, ەل-جۇرتتىڭ قۇرمەتىنە بولەنە بەرۋىڭىزگە تىلەكتەستىگىمدى بىلدىرەمىن» دەلىنگەن مەملەكەت باسشىسىنىڭ قۇتتىقتاۋىندا.
بۇعان قوسا باۋىرجان وماروۆ مەملەكەتتىك كەڭەسشى ەرلان قاريننىڭ دە قۇتتىقتاۋىن جەتكىزدى. ول ءوز سوزىندە عابيت ىسكەندەر ۇلىنا جۇيرىك جۋرناليست, پاراساتتى پۋبليتسيست رەتىندە ەرەكشە ىقىلاس ءبىلدىردى.
«قازىرگى قازاق جۋرناليستيكاسىنىڭ بەلدى دە بەدەلدى وكىلى ەكەنىڭىزدى جۇرتشىلىق جاقسى بىلەدى. كوسەمسوزدە كەسەك تۋىندىلارمەن كوزگە ءتۇسىپ, ۇلت رۋحانياتىنا ۇلكەن ۇلەس قوسىپ كەلەسىز. قالامىڭىزدان تۋعان «رۋحىڭدى تۇسىرمە, ۇلىم», «تاريحتى تۇلعالار جاسايدى», «توعىزىنشى تەرريتوريا» سەكىلدى كىتاپتار مەملەكەتتىلىك, ۇلتجاندىلىق ماسەلەلەرىن ارقاۋ ەتۋىمەن قۇندى. جۋرناليستيكاداعى قايتالانباس دارا جولىڭىز كەيىنگى بۋىنعا ۇلگى-ونەگە دەپ بىلەمىن. الداعى ۋاقىتتا دا وقىرمان قاۋىمدى جۇردەك قالامىڭىزدان, سەرگەك ساناڭىزدان تۋعان كەمەل دۇنيەلەرمەن قۋانتا بەرىڭىز. دەنىڭىزگە ساۋلىق, وتباسىڭىزعا اماندىق تىلەيمىن!» دەلىنگەن مەملەكەتتىك كەڭەسشى حاتىندا.
وسى ورايدا سەرىكتەستىك باسشىسى, اكادەميك ديحان قامزابەك ۇلى رەداكتسياعا كەلىپ تۇسكەن بىرقاتار قۇتتىقتاۋ حاتىن وقىپ بەردى. سونىڭ ءبىرى – سەنات توراعاسى ماۋلەن اشىمباەۆتىڭ تىلەگى.
ء«سىز سانالى عۇمىرىڭىزدى ۇلتتىق جۋرناليستيكانى دامىتۋعا ارناپ, بۇل جولدا ەسەلى ەڭبەك ەتىپ كەلەسىز. وسى باعىتتاعى تاباندىلىعىڭىز قاشاندا جوعارى باعاعا لايىق. قالامگەرلەردىڭ ءومىرى مەن ونەگەسىن جاڭا قىرىنان تانيتىن پورترەتتىك وچەركتەرىڭىز دە ۇلتتىق تۇلعاتانۋ ينستيتۋتىن ىلگەرىلەتۋگە قوسىلعان قۇندى ۇلەس ەكەنى ءسوزسىز. ءسىز شاكىرت تاربيەلەۋدىڭ دە وزىق ۇلگىسىن كورسەتتىڭىز. بۇگىندە ءتالىمىڭىزدى العان ءىزباسارلارىڭىز ەلىمىزدەگى بەلدى باسىلىمداردا جاۋاپتى قىزمەتتەر اتقارىپ ءجۇر. بۇگىندە قازاق ءباسپاسوزىنىڭ قارا شاڭىراعى – «Egemen Qazaqstan» گازەتىنىڭ باس رەداكتورى رەتىندە پاراسات بيىگىنەن كورىنىپ كەلەسىز. ءاردايىم وسىلاي مارتەبەڭىز جوعارى, ابىرويىڭىز اسقاق بولسىن. ويعا العان ارمان-مۇراتتارىڭىز ورىندالا بەرسىن!» دەپ سەنات سپيكەرى ىزگى نيەتىن بىلدىرگەن.
سونداي-اق پرەزيدەنت اكىمشىلىگىنىڭ باسشىسى رومان سكليار دا عابيت ىسكەندەر ۇلىنىڭ ۇلت جۋرناليستيكاسىن وركەندەتۋ جولىنداعى قاجىرلى ەڭبەگىن اتاپ كورسەتىپ, ءوزى ابىرويمەن باسقارىپ وتىرعان باس باسىلىمنىڭ ەل رۋحانياتى مەن قوعامدىق وي-پىكىردى دامىتۋداعى ورنى زور ەكەنىنە توقتالعان. بۇعان قوسا مەرەيتوي يەسىنىڭ ۇيىمداستىرۋشىلىق قابىلەتى مەن ازاماتتىق ۇستانىمى زامانداستارىنىڭ, وقىرمان قاۋىمنىڭ ىزەتىنە يە ەكەنى ايتىلعان.
بۇدان سوڭ ديحان قامزابەك ۇلى پرەمەر-ءمينيستردىڭ ورىنباسارى – مادەنيەت جانە اقپارات ءمينيسترى ايدا بالاەۆانىڭ قۇتتىقتاۋىن جاريا ەتتى.
ء«وزىڭىزدى وتاندىق جۋرناليستيكانىڭ دامۋىنا سۇبەلى ۇلەس قوسىپ كەلە جاتقان قارىمدى قالامگەر, ۇلت رۋحانياتىنا ادال قىزمەت ەتىپ جۇرگەن قايراتكەر ازامات رەتىندە بىلەمىز. عۇمىر جولىڭىزدى قازاق ءباسپاسوزىنىڭ وركەندەۋىنە ارناپ, جۋرناليستيكانىڭ بيىك تالاپتارىنا ساي ەڭبەك ەتىپ كەلەسىز. ۇزاق جىلدار رەسپۋبليكالىق باسىلىمداردا جەمىستى قىزمەت اتقارىپ, كاسىبي شەبەرلىگىڭىزبەن, ۇلت مۇددەسىنە دەگەن جاناشىرلىعىڭىزبەن كوپشىلىك قۇرمەتىنە بولەندىڭىز. قالامىڭىزدان تۋعان تۇششىمدى دۇنيەلەر وقىرماننىڭ رۋحاني دۇنيەسىن بايىتىپ, قوعامداعى وزەكتى ماسەلەلەردى كوتەرۋدەگى ازاماتتىق ۇستانىمىڭىزدى ايقىن تانىتىپ كەلەدى. الداعى ۋاقىتتا دا ەڭبەگىڭىزدىڭ جەمىسىن كورىپ, ابىرويىڭىز ارتا بەرسىن» دەپ ايدا بالاەۆا تىلەكتەستىك تانىتىپتى.
لەبىزدەر لەگىنەن سىرتقى ىستەر ءمينيسترى ەرمەك كوشەرباەۆ تا تىس قالماپتى. ونىڭ قۇتتىقتاۋىن باسقوسۋعا قاتىسقان قۇرمەتتى قوناق قۋات بوراش جەتكىزدى. مينيستر حاتىندا عابيت ىسكەندەر ۇلىن ماسس-مەديا سالاسىنىڭ بىلىكتى مەنەدجەرى رەتىندە باعالايتىنىن, ۇلت ءباسپاسوزىن وركەندەتۋگە سىڭىرگەن ەڭبەگى ەسەلى ەكەنىن ايتا كەلە, ىزگى مۇراتىنا جەتىپ, ابىروي بيىگىنەن كورىنە بەرۋىنە تىلەكتەس ەكەنىن ءبىلدىرىپتى.
سونىمەن قاتار القالى جيىندا باس رەداكتورعا مەملەكەتتىك قىزمەت ىستەرى اگەنتتىگىنىڭ توراعاسى دارحان جازىقباي, مادەنيەت جانە اقپارات ۆيتسە-ءمينيسترى قانات ىسقاقوۆ جانە ءال-فارابي اتىنداعى قازۇۋ باسقارما توراعاسى-رەكتور جانسەيىت تۇيمەباەۆتىڭ قۇتتىقتاۋ حاتتارى تابىستالدى.
باسقوسۋ بارىسىندا ءسوز العان زامانداس ارىپتەستەرى مەن ءىزباسار شاكىرتتەرى عابيت ىسكەندەر ۇلىنىڭ قالامگەرلىك شەبەرلىگىمەن قاتار, عيبراتتى ۇستازدىق جولىنا كەڭىنەن توقتالدى. جينالعان قاۋىم مەرەيتوي يەسىنىڭ ادامي بولمىسىنداعى زيالىلىقتى, ونىڭ ۇلكەنگە دە, كىشىگە دە بىردەي تانىتاتىن قامقورلىعى مەن شىنايى كىسىلىگىن ەرەكشە اتاي كەلە, بۇل قاسيەتتەردىڭ بۇگىنگى جاس بۋىن ءۇشىن تاپتىرماس ۇلگى ەكەنىن جەتكىزدى.