تامىلجىعان تابيعاتىمەن الەمگە ايگىلى ششۋچينسك-بۋراباي كۋرورتتىق ايماعى الىس-جاقىن شەتەلدەردەن كەلەتىن تالعامپاز تۋريستەردى قۇشاق جايا قارسى الۋعا قاپىسىز قامدانۋدا.
تاياۋدا وبلىس اكىمى مارات احمەتجانوۆ تازا اۋادا تىنىعىپ, جۇماق جەردىڭ عاجايىپ كوركىمەن تەرەڭىرەك تانىسىپ, ساف اۋاسىن جۇتىپ, قۇراتقا مىنگەندەي اۋناپ-قۋناپ قايتقىسى كەلەتىن جالپاق جۇرتقا قىزمەت كورسەتۋ بارىسىمەن تانىستى. الدىمەن, ءبيشى قايىڭدار ساياباعىندا بولدى. بۋراباي باۋرايىنداعى شىن شەبەر, زەرگەردىڭ ەپسەكتى قولىنان شىققانداي عاجايىپ ءبىر قۇبىلىس تۋعان جەردىڭ توسىندە سامال جەل ءلۇپ ەتە قالسا, توڭىرەك ءبيشى قايىڭداردىڭ مىڭ بۇرالعان بيىمەن ارلەنىپ, جالاۋلى جاسىل دۇنيە تۇگەل بيلەپ, كوڭىلىڭدى كوككە كوتەرەر ەدى. ءدال وسى جەردە تابان تىرەگەن ادام بۋرابايدىڭ سۇلۋلار تاققان سىرعاداي كوزدىڭ جاۋىن الاتىن بار قيىرىن كورە الار ەدى. كەيىنگى جىلدارى تۋريستىك قىزمەت كورسەتۋ ايرىقشا قارقىن الۋدا. كۋرورتتى ءوڭىردىڭ ينفراقۇرىلىمى كوپ-كورىم جاقسارىپ كەلەدى.
كەلەشەكتىڭ كەمەل بولۋىن كوكسەگەن كورىكتى ويدان تۋىندايتىن تۋريزم سالاسىنداعى بولاشاعى زور ينۆەستيتسيالىق جوبالار تانىستىرىلدى. الەمدىك برەندتەردىڭ ساناتىنداعى بىرنەشە قوناقۇي كەشەندەرى, ساق مادەنيەتى مۇراجايىنىڭ جوباسى جانە اقىلباي اۋىلىنداعى فورەل شارۋاشىلىعىن كەڭەيتۋ جوسپارلارى بار. وسى ۇمتىلىس ساتىمەن ساباقتالىپ كەتسە, تابيعي سالتاناتقا جاناشىر جانداردىڭ ىزگى نيەتىمەن, قۇرىش قولدارىمەن بوي كوتەرگەن زاماناۋي عيماراتتار دا ءسان ۇستەپ, اجارىن اشا تۇسكەندەي.
بۋراباي كەنتى ماڭىندا مىڭ ورىندىق اتشاپىرىم زالىمەن ارقيلى كورەرمەندەر وتكىزۋگە لايىقتالعان ورنى بار كونگرەسس ورتالىقتىڭ قۇرىلىسى ءوڭىردىڭ ءوڭىن كەلتىرە تۇسەرى داۋسىز.
«مەملەكەت باسشىسى قاسىم-جومارت توقاەۆتىڭ تاپسىرماسىمەن ششۋچينسك-بۋراباي كۋرورتتىق ايماعىنىڭ تۋريستىك الەۋەتىن جۇيەلى تۇردە دامىتىپ كەلەمىز. مىندەتىمىز تۋريستەر سانىن كوبەيتىپ قانا قويماي, جىل بويى ساپالى جانە جايلى دەمالىسقا مەيلىنشە جاعداي جاساۋ. ءوڭىر ءۇشىن ەكوتۋريزم, تاريحي تاعىلىمى بار تۋريزم جانە وتباسىلىق تۋريزم باستى باعىتقا اينالۋدا. جىل بويى جۇمىس ىستەۋ ينۆەستيتسيالىق تارتىمدىلىقتى ارتتىرادى», دەيدى وبلىس باسشىسى.
ءسوز اراسىندا 2025 جىلى بۋراباي باۋرايىندا 1,7 ميلليون ادام دەم السا, ونىڭ 24,7 مىڭى شەتەلدىك تۋريستەر ەكەن. بيىل دا از بولماسى بەلگىلى. سەبەپ, كوركەم تابيعاتتىڭ اياسىندا ولارعا ۇسىناتىن زاماناۋي كەشەندەر سانى جىل ساناپ كوبەيىپ كەلەدى. سونىڭ ءبىرى – ششۋچينسك قالاسىندا سالىنعان «ۇماي انا» ەكوپاركى. بۇل نىسان وڭىردەگى ماڭىزدى دەمالىس ورىندارىنىڭ بىرىنە اينالماق.
«ەكوپارك مەملەكەت باسشىسىنىڭ تاپسىرماسى بويىنشا اشىلىپ وتىر. وسىنداي جوبالاردى جۇزەگە اسىرۋ قولايلى قالالىق ورتانى قالىپتاستىرۋعا, ەكولوگيالىق مادەنيەتتى دامىتۋعا جانە تۇرعىنداردىڭ دەمالۋىنا ىقپال ەتەدى», دەدى وبلىس اكىمى مارات احمەتجانوۆ.
جاڭا ەكوپارك توڭىرەگى اباتتاندىرىلعان سەرۋەندەۋ اللەيالارى, دەمالىس ايماقتارى سپورت جانە بالالار الاڭدارى ورنالاسقان. ساياباقتىڭ اتاۋىنا ەنگىزۋگە بولعان باستى نىسان ءسابيىن ەمىرەنىپ, قۇشاعىنا العان انانىڭ اجارلى مۇسىندىك كومپوزيتسياسى ورنالاسقان.
جاڭالىققا حالىق ءدان رازى. بۋراباي اۋداندىق ارداگەرلەر كەڭەسىنىڭ توراعاسى وتەلباي بەيسەنوۆتىڭ پىكىرىنشە, «ۇماي انا» ساياباعى تەك جاستاردىڭ عانا ەمەس, بارشا ادامداردىڭ سۇيىكتى دەمالىس ورنىنا اينالماق.
بۇل كۇنى تاعى دا اق تۇيەنىڭ قارنى جارىلعان ادەمى وقيعا بولدى. الەۋمەتتىك وسال توپتار ساناتىنداعى كەزەكتە تۇرعان ازاماتتارعا پاتەر كىلتى تابىستالىپ, سپورت سالاسىندا جوعارى جەتىستىكتەرگە جەتكەن سپورتشىلار ماراپاتتالدى. ءىس-شارا سوڭى ءماندى دە ماعىنالى كونتسەرتتىك باعدارلاماعا ۇلاستى.
اقمولا وبلىسى