وتكەن اپتادا ەلىمىزدىڭ فۋتبولشىلارى ءوز جانكۇيەرلەرىن قۋانتتى. گرەكيانىڭ سولونيكيىندە ءوتىپ جاتقان جاستار اراسىنداعى ەۋروپا چەمپيوناتىنىڭ (U-19) ىرىكتەۋ تۋرنيرىندە جەرلەستەرمىز سەربيانى 3:1 ەسەبىمەن جەڭدى. باسەكەنىڭ 9-مينۋتىندا العاشقى گولدى سەربتەر سوقتى. بۇل جاعداي ءبىزدىڭ جىگىتتەردىڭ جىگەرىن جاسىتقان جوق. كوپ كەشىكپەي تورە يسماعۇلوۆ تارازى باسىن تەڭەستىرسە, يسمايل بەكبولات دۋبل اۆتورى اتاندى. بۇعان دەيىن جەرلەستەرىمىز پورتۋگاليامەن 1:1 ەسەبىمەن تەڭ تۇسكەن ەدى. ءسويتىپ, وتاندىق فۋتبول شەبەرلەرى جارىس كەستەسىندە كوش باستاپ, جارىستىڭ كەلەسى كەزەڭىنە ءوتتى.
ارالاس جەكپە-جەكتەن براتيسلاۆادا ۇيىمداستىرىلعان «Oktagon 89» ءتۋرنيرىنىڭ باستى باسەكەسىندە 37 جاستاعى جالعاس جۇماعۇلوۆ (19-9) 23 جاستاعى برازيليالىق يگور سەۆەرينومەن (10-1) ايقاستى. كەزىندە UFC-دە ونەر كورسەتكەن قوس سپورتشىنىڭ اراسىنداعى باسەكەدە جەڭىمپاز انىقتالمادى. سەبەبى ەكىنشى راۋندتا سەۆەرينو بەلدەن تومەن سوققى جاسادى. قارسىلاسىنىڭ ەرەجە بۇزعان ارەكەتىنەن كەيىن جالعاس جەكپە-جەكتى جالعاستىرا المادى. ەگەر وسى جارىس-تا جەرلەسىمىز جەڭىسكە جەتكەندە, وندا ەكى سالماقتىڭ چەمپيوندىق بەلبەۋىن يەلەنەتىن ەدى. تۋرنيردە تاعى ءبىر جەرلەسىمىز داستان امانگەلدى (10-1) فرانتسيالىق موكتاروم بەنكاسيدەن (25-10-0-2) باسىم ءتۇستى.
انگليانىڭ بورنمۋتىندا جالاۋى جەلبىرەگەن كاسىپقوي كەشىندە اسا اۋىر سالماقتاعى يۆان دىچكو (15-1, 14 كو) الاڭ يەسى حارۆي دايكسپەن (7-0-1, 0 كو) جۇدىرىقتاستى. 10 راۋندقا ەسەپتەلگەن كەزدەسۋ سوڭىنا دەيىن سوزىلىپ, تورەشىلەردىڭ شەشىمى بويىنشا وتانداسىمىز جەڭىسكە جەتتى.
ۇلان-باتىردا تۇساۋى كەسىلگەن رەيتينگتىك تۋرنيردە ەلىمىزدىڭ گرەك-ريم كۇرەسى شەبەرلەرى ءۇش جۇلدەگە قول جەتكىزدى. نۇراسىل امانالى (97 كگ) كۇمىس, ەركەبۇلان ارداقوۆ (63 كگ) پەن ولجاس سىرلىباي (130 كگ) قولا مەدال يەلەندى. ايەلدەر كۇرەسىنەن نيلۋفار رايموۆا (57 كگ) مەن ەلميرا سىزدىقوۆا (76 كگ) ءۇشىنشى ورىنعا تابان تىرەدى. ەركىن كۇرەستەن وتكەن جارىستا جەتى جەرلەسىمىز جەڭىس تۇعىرىنا كوتەرىلدى. اسىل ايتاقىن (61 كگ), ازامات داۋلەتبەكوۆ (92 كگ), ەدىگە قاسىمبەك (125 كگ) كۇمىس, مەيرامبەك قارتباي (57 كگ), ادىلەت المۇحامەدوۆ (61 كگ), شامسات تايىر (79 كگ), بولات ساقاەۆ (86 كگ) قولا مەدال ەنشىلەدى.
فۋتبولدان ەلىمىزدىڭ ۇلتتىق قۇراماسى ەرەۆاندا ارمەنيامەن جولداستىق كەزدەسۋ وتكىزىپ, ماتچ تەڭ اياقتالدى – 1:1. 50-مينۋتتا ماكسيم سامورودوۆ سوققان دوپقا 53-مينۋتتا ەدۋارد سپەرتسيان جاۋاپ قايتاردى.
ەلىمىزدىڭ جاس تەننيسشىلەرى اسىلجان ارىستانبەكوۆا مەن ىڭكار دۇيسەباي تۇركيانىڭ قايسەرىسىندە شىمىلدىعى تۇرىلگەن حالىقارالىق ءتۋرنيردىڭ جۇپتىق سايىسىندا باس جۇلدەنى جەڭىپ الدى. فينالدا ولار جەرگىلىكتى ويىنشىلار – دۋرۋ سوكە مەن دوگو تۇركىمەننەن باسىم ءتۇستى – 6:2, 2:6, 10:5.
ارالاس جەكپە-جەكتەن سانكت-پەتەربۋرگتە ۇيىمداستىرىلعان «Fight Nights 138» تۋرنيرىندە ەلىمىزدىڭ قوس سپورتشىسى كۇش سىناستى. باعاشار قورالاسوۆ (4-1) رەسەيلىك ماحمۋد اكيموۆتى (9-1-1) ۇپاي سانىمەن ۇتسا, گويتي دازاەۆ (12-4-1) سول ەلدىڭ تاعى ءبىر وكىلى سەرگەي رومانوۆقا (26-6) ەسە جىبەردى.