ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىندە وتكەن «بىرىككەن ۇلت جەڭەدى!» اتتى VI حالىقارالىق بەينەماتەريالدار بايقاۋى بيىل مازمۇنى مەن فورماتى جاعىنان جاڭا دەڭگەيگە كوتەرىلدى, دەپ حابارلايدى Egemen.kz
ۋنيۆەرسيتەتتىڭ 30 جىلدىعىنا ارنالعان بايقاۋ «ادام جانە جاساندى ينتەللەكت – جاڭا كوممۋنيكاتسيا فورماسى» تاقىرىبىن ارقاۋ ەتىپ, تسيفرلىق داۋىردەگى مەديانىڭ بولاشاعىن, جاساندى ينتەللەكتىنىڭ كوممۋنيكاتسيا كەڭىستىگىندەگى ءرولىن شىعارماشىلىق تۇرعىدا سارالاعان جاستاردىڭ باسىن قوستى.
حالىقارالىق بايقاۋعا اقش, ۇلىبريتانيا, يسپانيا, وڭتۇستىك افريكا رەسپۋبليكاسى, جاڭا زەلانديا, بىرىككەن اراب امىرلىگى, قىرعىزستان جانە قازاقستان ۋنيۆەرسيتەتتەرىنەن 100-دەن استام جۇمىس كەلىپ ءتۇستى. جاس جۋرناليستەر مەن مەديا مامانداردىڭ جۇمىستارى مازمۇندىق تەرەڭدىگىمەن, كرەاتيۆتى رەجيسسۋراسىمەن جانە تسيفرلىق تەحنولوگيالاردى ەركىن مەڭگەرۋىمەن ەرەكشەلەندى.
ماراپاتتاۋ راسىمىنە ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى – باسقارما توراعاسى ەرلان ءباتتاش ۇلى سىدىقوۆ, «ەۋرازيا ۇلتتىق ۋنيۆەرسيتەتى» كەاق ديرەكتورلار كەڭەسىنىڭ توراعاسى دارحان قامزابەك ۇلى مىڭباي, سونداي-اق ەلىمىزدىڭ مەديا سالاسىنا تانىمال تۇلعالار قاتىستى.
بايقاۋدىڭ يدەيا اۆتورى ءارى جەتەكشىسى – «دارىن» مەملەكەتتىك سىيلىعىنىڭ يەگەرى, كاسىبي تەلەجۋرناليست, پروفەسسور ۇلبوسىن مەيىربەكقىزى ەسەنبەكوۆا. بايقاۋدى ۇيىمداستىرۋ كوميتەتىنىڭ قۇرامىندا قازاقستان پرەمەر-ءمينيسترى ءباسپاسوز قىزمەتى باسشىسىنىڭ ورىنباسارى دۋمان حاميت, «Qazaqstan» ۇلتتىق تەلەارناسىنىڭ ديرەكتورى جالعاس التاەۆ, «24KZ» تەلەارناسىنىڭ باس رەداكتورى نازىم ستامبەكوۆا, «اپتا» ساراپتامالىق باعدارلاماسىنىڭ رەداكتورى دانيار قايىرتاي, رەسپۋبليكاعا تانىمال مەديا-مەنەدجەر ىسقاق ەگەمبەرديەۆ جانە مەديا سالانىڭ بەلگىلى وكىلدەرى بولدى.
بايقاۋدىڭ گران-پري جۇلدەسىن ەۋرازيا ۇلتتىق ۋنيۆەرسيتەتىنىڭ ستۋدەنتى ەرالىقىزى الينۋرا يەلەنسە, ءى ورىندى قىزىلورداداعى «بولاشاق» ۋنيۆەرسيتەتىنىڭ ستۋدەنتى ابدىقالىق نۇراسىل جەڭىپ الدى. ءىى ورىن ءجۇسىپ بالاساعۇن اتىنداعى قىرعىز ۇلتتىق ۋنيۆەرسيتەتىنىڭ ستۋدەنتى ماليكا دينيستانوۆا مەن ەۇۋ دوكتورانتى نۇرسۇلتان اقجولعا بۇيىردى. ال ءىىى ورىن يەگەرلەرىنىڭ قاتارىندا University of Chicago ستۋدەنتى رامازان باحاربەكوۆ پەن اقتوبە ۋنيۆەرسيتەتىنىڭ ستۋدەنتى گۇلداۋرەن كوجاگۋلوۆا بولدى.
«بەيسەن قۇرانبەك» اتىنداعى ارنايى نوميناتسيانىڭ جەڭىمپازى رەتىندە Stanford University ستۋدەنتى ايۆار ابدراش ۇلى ماراپاتتالدى. ونىڭ شىعارماشىلىق جۇمىسى مازمۇندىق تەرەڭدىگىمەن, زاماناۋي مەدياتىلمەن جانە كاسىبي شەشىمىمەن ەرەكشەلەنىپ, قازىلار القاسىنىڭ جوعارى باعاسىنا يە بولدى.
بايقاۋدىڭ ارنايى نوميناتسيالارى دا كاسىبي دەڭگەيىمەن ەرەكشەلەندى. «ۇزدىك پروديۋسەرلىك جۇمىس» نوميناتسياسىن ەۇۋ ستۋدەنتتەرى ايمارال قۋاتبەك پەن جانسايا تاڭىرقۇل يەلەندى. بۇل ماراپاتتى بەلگىلى پروديۋسەر, ءانشى ءارى اكتريسا مۇقان ءمولدىر تابىستادى. ماراپاتتاۋ بارىسىندا مۇقان ءمولدىر مەن ايىم تۇرسىنبەكقىزى ورىنداعان «ەلىم دە, جەرىم دە» ءانى قاتىسۋشىلاردىڭ ىقىلاسىنا بولەندى.
سونداي-اق راسىمگە «قازاقستان» ۇلتتىق ارناسىنىڭ تانىمال جۇرگىزۋشىسى عالىمجان كەڭشىلىك, «حابار» ارناسىنىڭ جۇرگىزۋشىسى ارداق ساعيدوللا, «Qazaqstan» تەلەارناسىنىڭ «Aqparat» باعدارلاماسىنىڭ جۇرگىزۋشىسى اللا گاۆرينا, «24KZ» ارناسىنىڭ جۇرگىزۋشىسى ازامات ابىلقايىر, تەلەجۇرگىزۋشى ارداق قاسىمحان, «قازاقستان» ۇتا جۇرگىزۋشىسى مۇحتار ءومىرتاي جانە باسقا دا مەديا كەڭىستىكتىڭ تانىمال تۇلعالارى قاتىستى.
ماراپاتتاۋ راسىمىندە ۇيىمداستىرۋ كوميتەتىنىڭ مۇشەلەرى جەڭىمپاز جۇمىستاردىڭ ەرەكشەلىكتەرىنە ارنايى توقتالدى. ەۋرازيا ۇلتتىق ۋنيۆەرسيتەتىنىڭ پرورەكتورى ينديرا رىستينا حالىقارالىق بايقاۋدىڭ جىل سايىن اۋقىمى كەڭەيىپ كەلە جاتقانىن اتاپ وتسە, قازىلار القاسىنىڭ مۇشەسى نازىم ستامبەكوۆا قاتىسۋشىلاردىڭ كرەاتيۆتىلىگى مەن جاڭا مەديانىڭ ءتىلىن مەڭگەرۋىنە جوعارى باعا بەردى. دانيار قايىرتاي جاساندى ينتەللەكتىڭ كوممۋنيكاتسيالىق كەڭىستىكتەگى رولىنە نازار اۋداردى.
ماراپاتتاۋ ءراسىمى بارىسىندا پروفەسسور ۇلبوسىن ەسەنبەكوۆانىڭ 55 جاس مەرەيتويىنا دا قۇرمەت كورسەتىلدى. «AMANAT» پارتياسى, «قازاقستان» جانە «حابار» تەلەارنالارىنىڭ, «Qazcontent» اكتسيونەرلىك قوعامىنىڭ باسشىلارى مەرەيتوي يەسىنە ارنايى العىس حاتتار مەن قۇرمەت گراموتالارىن جولدادى. بۇل – وتاندىق تەلەجۋرناليستيكا مەن مەديا ءبىلىم بەرۋ سالاسىنا سىڭىرگەن ۇزاق جىلعى ەڭبەككە دەگەن جوعارى قۇرمەت بەلگىسى بولدى.