قازاقستاننىڭ تجم قۇتقارۋشىلارى تاجىكستان رەسپۋبليكاسىندا وتەتىن جەر سىلكىنىستەرىنىڭ سالدارى مەن كليماتتىق تاۋەكەلدەرگە دەن قويۋ بويىنشا حالىقارالىق كوپجاقتى وقۋ-جاتتىعۋعا قاتىسادى. ۆەدومستۆو دەلەگاتسياسىنىڭ قۇرامىندا «بارىس» رەسپۋبليكالىق قۇتقارۋ قىزمەتىنىڭ, الماتى قالاسى تجد قۇتقارۋ قىزمەتىنىڭ, قاراعاندى وبلىسى مەن شىمكەنت قالاسى تجد, سونداي-اق تجم اپاتتار مەديتسيناسى ورتالىعىنىڭ قىزمەتكەرلەرى بار, دەپ حابارلايدى Egemen.kz
حالىقارالىق وقۋ-جاتتىعۋدىڭ نەگىزگى ماقساتى ۆەدومستۆوارالىق جانە ترانسشەكارالىق ءوزارا ءىس-قيمىل تەتىكتەرىن جەتىلدىرۋ, اۆاريالىق-قۇتقارۋ بولىمشەلەرىنىڭ جەدەل ازىرلىك دەڭگەيىن ارتتىرۋ, سونداي-اق سەيسميكالىق بەلسەندىلىك پەن كۇشەيىپ كەلە جاتقان كليماتتىق تاۋەكەلدەردەن تۋىنداعان تابيعي سيپاتتاعى توتەنشە جاعدايلار كەزىندە كۇشتەر مەن قۇرالداردى قولدانۋ تيىمدىلىگىن تاجىريبە جۇزىندە تەكسەرۋ.
قويىلعان مىندەتتەردى ورىنداۋ ءۇشىن قۇتقارۋشىلار وتىمدىلىگى جوعارى زاماناۋي تەحنيكانى, اۆاريالىق-قۇتقارۋ جابدىقتارىن, گيدراۆليكالىق اۆاريالىق-قۇتقارۋ قۇرالدارىن, رادياتسيالىق, حيميالىق جانە بيولوگيالىق قورعاۋ قۇرالدارىن, سونداي-اق ارنايى الپينيستىك جانە سۇڭگۋىرلىك جابدىقتاردى قولدانادى.
قازاقستاندىق قۇتقارۋشىلاردىڭ حالىقارالىق وقۋ-جاتتىعۋعا قاتىسۋى توتەنشە جاعدايلارعا دەن قويۋدىڭ وڭىرلىك جۇيەسىن نىعايتۋدىڭ ماڭىزدى تەتىگىنە اينالىپ, ورتالىق ازيا مەملەكەتتەرىنىڭ بەيىندى قىزمەتتەرى اراسىنداعى ۇيلەستىرۋ دەڭگەيىن ارتتىرۋعا, سونداي-اق جويقىن جەر سىلكىنىستەرى مەن ترانسشەكارالىق سيپاتتاعى وزگە دە تابيعي قاۋىپتەردىڭ سالدارىن جويۋعا دەن قويۋدىڭ پراكتيكالىق تەتىكتەرىن جەتىلدىرۋگە مۇمكىندىك بەرەدى.
حالىقارالىق وقۋ-جاتتىعۋ «سۋ جانە كليماتتىق تاۋەكەلدەر: عىلىم, مونيتورينگ جانە باسقارۋ» وڭىرلىك فورۋمى اياسىندا ۇيىمداستىرىلىپ, اۋقىمدى جويقىن جەر سىلكىنىسىنىڭ سالدارىن جويۋ كەزىندە مەملەكەتارالىق دەن قويۋ الگوريتمدەرىن كەشەندى تۇردە پىسىقتاۋعا باعىتتالعان.