داستان مۇحامەدراحيم فرانتسيانىڭ كانن قالاسىندا وتكەن WIBA Travel Awards ماراپاتتاۋ راسىمىندە «ۇزدىك ساياحاتشى-بلوگەر 2026» نوميناتسياسىن جەڭىپ الدى. بۇل تۋرالى بلوگەر ءوزىنىڭ جەكە پاراقشاسىندا جاريالادى, دەپ حابارلايدى Egemen.kz
وسىلايشا قازاقستاندىق بلوگەردىڭ ەسىمى الەمگە تانىمال ينفليۋەنسەرلەرمەن قاتار اتالدى.
WIBA Awards – حالىقارالىق دەڭگەيدە تانىلعان كونتەنت اۆتورلارىن ماراپاتتايتىن بەدەلدى سىيلىقتاردىڭ ءبىرى. بۇل ماراپات digital-يندۋسترياعا ىقپال ەتىپ, اۋديتوريا نازارىن اۋدارا العان اۆتورلارعا تابىستالادى.
داستان مۇحامەدراحيمنىڭ ۆيدەولارى تابيعاتتىڭ كوركىن, ءتۇرلى قالالاردىڭ اتموسفەراسىن جانە ەلدەردىڭ مادەنيەتىن ەرەكشە كينو ستيلىندە كورسەتۋىمەن ەرەكشەلەنەدى. سوڭعى ءبىر جىل ىشىندە ونىڭ كوپتەگەن روليگى ميلليونداعان قارالىم جيناپ, كەيبىرى Instagram جەلىسىنىڭ رەسمي پاراقشالارى مەن ۇسىنىمدارىنا شىققان.
جەلى قولدانۋشىلارى مەن ارىپتەستەرى بلوگەردى جەڭىسىمەن قۇتتىقتاپ, بۇل جەتىستىكتى وتاندىق بلوگينگ ءۇشىن ماڭىزدى وقيعا دەپ باعالاپ جاتىر.
ايتا كەتەيىك, بۇعان دەيىن داستان مۇحامەدراحيم WIBA Awards 2026 جەڭىمپازدارىنىڭ قاتارىنا ەنگەنىن حابارلاعان بولاتىن. الايدا ماراپاتتى تابىستاۋ ءراسىمى ەندى ۇيىمداستىرىلدى.