الماتى, تۇركىستان جانە جامبىل وبلىستارىندا جولشىلار شۇڭقىرلاردى جاماۋ جانە جولداردى تاڭبالاۋ جۇمىستارىنا كىرىسىپ كەتتى. بۇل تۋرالى يندۋستريا جانە ينفراقۇرىلىمدىق دامۋ مينيسترلىگىنىڭ ءباسپاسوز قىزمەتى حابارلادى.
الماتى وبلىسىندا بۇگىنگى تاڭدا «الماتى – نۇر-سۇلتان» اۆتوموبيل جولىنىڭ 45-59 شاقىرىمىندا, «الماتى – بىشكەك» جولىنىڭ 25-27 شاقىرىمىندا شۇڭقىرلاردى جاماۋ جۇمىستارى باستالدى. جوندەۋمەن قامتىلعان جولداردىڭ جالپى اۋدانى 80 مىڭ شارشى مەتردى قۇرايدى. اتالمىش جۇمىستار ەكى اي ىشىندە اياقتالادى دەپ جوسپارلانۋدا. شارالارعا مامانداندىرىلعان تەحنيكانىڭ 7 بىرلىگى مەن 20-دان استام مامان جۇمىلدىرىلعان. سونداي-اق, مۇندا جولداردىڭ قوزعالىس بولىگىن تاڭبالاۋ, جارىقتاردى جويۋ جۇمىستارى باستالدى.
تۇركىستان وبلىسىندا «جيزاق – گاگارين – جەتىساي – اسىقاتا – سارىاعاش – جىبەك جولى» جولىندا شۇڭقىرلاردى جاماۋ جۇمىستارى جۇرگىزىلدى. بۇدان بولەك, جولدىڭ قوزعالىس بولىگىن تاڭبالاۋ, جول بەلگىلەرىن ورناتۋ جۇمىستارى اياقتالعان.
جامبىل وبلىسىنداعى جولداردىڭ 8 مىڭ شارشى مەترىندە شۇڭقىرلاردى جاماۋ جۇمىستارى جۇرگىزىلەدى دەپ جوسپارلانۋدا. جول قىزمەتتەرى مۇنداي جۇمىستاردى «الماتى – تاشكەنت – تەرمەز» جولىنىڭ 239-240 شاقىرىمىندا اياقتاعان. قازىرگى تاڭدا جولداردى تاڭبالاۋ جانە جول بويىن تازالاۋ جۇمىستارى جۇرگىزىلىپ جاتىر.
ايتا كەتەيىك, 2020 جىلى قازاقستان جولدارىنىڭ شامامەن 484 مىڭ شارشى مەترىندە شۇڭقىرلاردى جاماۋ جۇمىستارى جۇرگىزىلمەك. جولداردىڭ 28 مىڭ شاقىرىمى تاڭبالانىپ, 12 مىڭ جول بەلگىلەرى اۋىستىرىلادى دەپ جوسپارلانۋدا.