بۇرناعى كۇنى ماجىلىستە ءتورتىنشى پارلامەنتتىك سەسسيانىڭ اياقتالۋىنا وراي وسى پالاتا اپپاراتى قىزمەتكەرلەرىنىڭ سالتاناتتى جينالىسى بولىپ ءوتتى.
پارلامەنت ءماجىلىسى توراعاسىنىڭ ورىنباسارى ۆلاديمير بوبروۆ دەپۋتاتتار اتىنان پالاتا اپپاراتىندا قىزمەت ىستەيتىن مەملەكەتتىك قىزمەتشىلەردى ءارىپتەستەرىم, دەپ ايتا كەلىپ, قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ ايقىنداپ بەرگەن ستراتەگيالىق باعىتىن زاڭمەن قامتاماسىز ەتۋدە دەپۋتاتتار مەن پارلامەنت قىزمەتكەرلەرى بارلىق جۇمىستى بىرلەسىپ اتقارعانىن تىلگە تيەك ەتتى.
ءماجىلىس توراعاسىنىڭ ورىنباسارى ريزاشىلىعىن بىلدىرە تۇرىپ, پالاتا توراعاسىنىڭ اتىنان بىرقاتار پارلامەنت قىزمەتكەرلەرىنە العىس حات تابىس ەتتى.
ءماجىلىس اپپاراتىنىڭ باسشىسى ەرگەن دوشاەۆ تا جىلى لەبىزىن جەتكىزىپ, العىس ايتتى جانە مەملەكەتتىك قىزمەتشىلەرگە جاۋاپتى قىزمەتتەرىندە ابىرويلى بولا بەرۋىنە تىلەكتەستىگىن ءبىلدىردى.