«نۇر وتان» حالىقتىق-دەموكراتيالىق پارتياسى مەملەكەتتىڭ ەكونوميكالىق ساياساتىنىڭ باسىم باعىتتارىنىڭ ءبىرى – كاسىپكەرلىكتى قارقىندى دامىتۋدى قولدايدى. جانە دە قازاقستان حالقىنا 2011 جىلعى جولداۋىندا جانە «نۇر وتان» حدپ-نىڭ ءحىىى سەزىندە مەملەكەت باسشىسى, پارتيا توراعاسى نۇرسۇلتان نازارباەۆ بەرگەن تاپسىرمالاردى ورىنداي وتىرىپ, شاعىن جانە ورتا بيزنەستى قولداۋ جونىندەگى كەڭ اۋقىمدى ءىس-شارالاردى جۇرگىزۋدە.
نۇروتاندىقتار كاسىپكەرلىكتى دامىتۋ ءجونىندەگى باستى مەملەكەتتىك باعدارلامالاردىڭ ىسكە اسىرىلۋىن تۇراقتى تۇردە باقىلاپ, مەملەكەتتىك ورگاندارمەن بىرلەسە «بيزنەستىڭ جول كارتاسى – 2020» باعدارلاماسىنا قاتىسۋ ماسەلەلەرى بويىنشا ازاماتتاردى قابىلداۋ كۇنىن ۇنەمى وتكىزىپ وتىرادى.
پارتيا الاڭىندا بيزنەستىڭ اكىمشىلىك كەدەرگىلەرىن ازايتۋ ماسەلەلەرى ءجيى قاراستىرىلادى. سونىمەن قاتار, «نۇر وتان» پارتياسى ۇكىمەت ازىرلەگەن كاسىپكەرلىك سالاسىنداعى ونشا اۋىر ەمەس جانە ورتاشا اۋىر ەكونوميكالىق قىلمىستار ءۇشىن قىلمىستىق جاۋاپكەرشىلىكتى ليبەراليزاتسيالاۋعا ارنالعان زاڭ جوباسىنىڭ كەڭ اۋقىمدى تالقىلاۋ جۇمىسىن ۇيىمداستىردى. بۇگىندە پاۆلودار وبلىسىندا نۇروتاندىق دەپۋتاتتاردىڭ باستاماسىمەن قازاقستاندىقتاردى, سونىڭ ىشىندە اۋىل تۇرعىندارىن دا بيزنەسپەن اينالىسۋعا جاپپاي تارتۋعا باعىتتالعان «ەرتەڭىڭ ءۇشىن ايانبا» باعدارلاماسى قاناتقاقتى رەجىمدە ىسكە اسىرىلىپ جاتىر.
شاعىن جانە ورتا كاسىپكەرلىكتى قولداۋ ءجونىندەگى باسقا دا شارالاردى قاراستىرۋ ماقساتىندا نۇروتاندىقتار «شاعىن جانە ورتا بيزنەستى دامىتۋداعى جۇيە قۇراۋشى كاسىپورىنداردىڭ ءرولى» تاقىرىبىنداعى «ءدوڭگەلەك ۇستەلدى» وتكىزۋدى ۇسىندى. وتىرىس «نۇر وتان» پارتياسىنىڭ ورتالىق اپپاراتىندا ءوتتى.
قازىرگى كەزدە ەلباسى تاپسىرماسى بويىنشا ۇكىمەت ەلىمىزدىڭ ءىرى كاسىپورىندارىندا قازاقستاندىق ۇلەستى ارتتىرۋ جونىندە كەڭ اۋقىمدى جۇمىس جۇرگىزىپ وتىر. ال جۇيە قۇراۋشى كاسىپورىنداردىڭ ءوزى دە جەرگىلىكتى ۇلەستى ارتتىرا الادى, ياعني تاۋارلار مەن قىزمەتتەردى جەرگىلىكتى كاسىپكەرلەردەن ساتىپ الا الادى. شاعىن جانە ورتا بيزنەستى دامىتۋداعى جۇيە قۇراۋشى كاسىپورىنداردىڭ ءدال وسىنداي ءرولى تۋرالى دوڭگەلەك ءۇستەلگە قاتىسۋشىلار, ياعني ۇكىمەت مۇشەلەرى, پارلامەنت دەپۋتاتتارى, ەلىمىزدىڭ ءىرى كاسىپورىندارىنىڭ جەتەكشىلەرى پىكىر الماستى.
«دوڭگەلەك ۇستەل» بارىسىندا قازاقستاندىق ەكونوميكانىڭ كوشباسشىلارى مەن جەرگىلىكتى بيزنەس قاۋىمداستىعىمەن ءوزارا ءارىپتەستىگىنىڭ تۇرلەرى قاراستىرىلىپ, سونداي-اق مەملەكەتتىك دامۋ باعدارلامالارىنىڭ شەڭبەرىندەگى بيزنەس-باستامالارعا كەشەندى مەملەكەتتىك قولداۋ كورسەتۋ مۇمكىندىكتەرى تالقىلاندى.
مىسال رەتىندە جەزقازعان, بالقاش, ءساتباەۆ قالالارىنىڭ باستى جۇيە قۇراۋشى كاسىپورنى – «قازاقمىس» كورپوراتسياسىنىڭ تاجىريبەسى قاراستىرىلدى. «قازاقمىس» جەرگىلىكتى كاسىپكەرلەردى قولداۋدىڭ ءارتۇرلى فورمالارىن قولدانادى: ايماقتىڭ شاعىن جانە ورتا كاسىپورىندارىنا كورپوراتسيانىڭ نەگىزگى ءونىمى جەتكىزىلىپ, سونداي-اق ينۆەستيتسيالار ءبولىنىپ, ولاردىڭ ءونىمى ساتىپ الىنادى. سونىمەن قاتار, جەرگىلىكتى كاسىپكەرلىكتىڭ مامانداندىرىلعان مەردىگەرلەرىنە كورپوراتسياعا قاجەتتى تاۋارلار, جۇمىستار مەن قىزمەتتەرگە ۇسىنىستار بەرىلەدى.
«نۇر وتان» پارتياسى وسى تاجىريبەنى جان-جاقتى زەرتتەي وتىرىپ, قازاقستاننىڭ باسقا ايماقتارىنداعى ءىرى كاسىپورىندار مەن مەملەكەتتىك ورگاندارىنىڭ قاتىسۋىمەن ەنگىزۋدى جوسپارلاپ وتىر. وسىعان وراي جۋىق ارادا كاسىپكەرلىكتىڭ ودان ءارى تۇراقتى دامۋىنا جاعداي جاساۋعا باعىتتالعان ارنايى پارتيا باعدارلاماسى ازىرلەنەدى.
دوڭگەلەك ۇستەل بارىسىندا سويلەگەن ءسوزىندە پارتيا توراعاسىنىڭ ءبىرىنشى ورىنباسارى نۇرلان نىعماتۋلين: «بۇگىن ەلباسىمىز, پارتيامىزدىڭ توراعاسى نۇرسۇلتان ءابىش ۇلى نازارباەۆتىڭ ارنايى تاپسىرماسى بويىنشا «نۇر وتان» حالىقتىق-دەموكراتيالىق پارتياسى كاسىپكەرلىكتى تۇراقتى دامىتۋعا ارنالعان جاڭا باعدارلاما دايىنداۋدى قولعا الادى. ءبىزدىڭ باستى ماقساتىمىز – ەلىمىزدىڭ بارلىق ايماقتارىندا ورنالاسقان ءىرى وندىرىستىك كاسىپورىندارىنىڭ شاعىن جانە ورتا بيزنەسكە جان-جاقتى قولداۋ كورسەتۋى», – دەدى.
وتىرىستا ۇكىمەت پەن پارلامەنتكە جىبەرىلەتىن جەرگىلىكتى شاعىن جانە ورتا كاسىپكەرلىكتىڭ دامۋىنا قولايلى جاعداي جاساۋ جونىندەگى ناقتى ۇسىنىستار ازىرلەندى. ال ءىرى جانە شاعىن كاسىپورىنداردىڭ باسشىلارى وسى شارالاردىڭ ءناتيجەسى ناقتى قالاعا نە بولماسا ناقتى ايماققا وڭ اسەرىن تيگىزەتىنىنە سەنىمدى.
«ەگەمەن-اقپارات»