گرەكيا پارلامەنتى دەفولتتىق جاعدايدان شىعارۋ ءۇشىن ەل قاجەتىنە جاراتىلاتىن قاراجاتتى 28 ملرد. ەۋروعا قىسقارتۋ ماسەلەسىن قاراۋدا. ويتپەگەن كۇندە, حالىقارالىق ۆاليۋتا قورى كەزەكتى بەرىلەتىن 12 ملرد. دوللار ترانشتى گرەكياعا جىبەرمەيمىز دەپ وتىر. جالپى حۆق-نىڭ بۇل ەلگە بولگەن قاراجاتى 110 ملرد. ەۋرونى قۇرايدى. الايدا, پارلامەنتتىڭ بۇل شەشىمى حالىق ءۇشىن وڭايعا تۇسپەيتىن سىڭايلى. سالىق مولشەرى ۇلعايىپ, 150 مىڭنان استام مەملەكەتتىك قىزمەتشى قىسقارتۋعا ۇشىراپ, ءتىپتى قوعامدىق كولىكتەردى پايدالانۋ دا قىمباتتاي تۇسپەك. بۇل دەگەنىمىز–ناعىز «جىعىلعانعا جۇدىرىق». سەبەبى, قازىرگى كۇننىڭ وزىندە گرەك جۇرتشىلىعى كۇنبە-كۇن كوشەلەرگە شىعىپ, ۇكىمەت جۇمىسىنا نارازىلىقتارىن ءبىلدىرىپ جاتىر. كوشەلەردە ءتارتىپ ساقشىلارىمەن ارادا قاقتىعىستار بولىپ, جاراقات العاندار دا بار. بىرنەشە كۇن بويىنا ەلدە مەديتسينا قىزمەتكەرلەرى, جۋرناليستەر, مەملەكەتتىك قىزمەتشىلەر, بانكيرلەر ەرەۋىلگە شىعىپ, اۋە ديسپەچەرلەرى جۇمىستارىن 4 ساعاتقا توقتاتتى. وسىنىڭ اسەرىنەن تەك ءبىر عانا Aegean Airlines اۋە كومپانياسى 31 رەيستىڭ توقتاتىلعانىن, 82-ءسىنىڭ ۇشۋ ۋاقىتىنىڭ شەگەرىلگەنىن مالىمدەگەن. بۇل–ونسىز دا قينالىپ جاتقان ەل ەكونوميكاسىنا از سالماق ەمەس. دەمەك, تۋريستىك بيزنەستەن ەل قورجىنىنا تۇسەر پايدا دا ازايادى. قارۋ كوتەرىلىسشىلەر قولىنا ءتۇستى كوتەرىلىسشىلەر تاۋلى ايماقتا ورنالاسقان زينتان قالاسىنان 25 شاقىرىمداعى كاددافيدىڭ جەر استىنداعى اسكەري قويماسىن باسىپ العان. ەندى ولاردىڭ قولىندا زىمىراندار, زەڭبىرەكتەر جانە باسقا دا قارۋ تۇرلەرى بار. ناتو-نىڭ كومەگىنە سۇيەنگەن كوتەرىلىسشىلەر اسكەري بازا ماڭىن اۋەدەن بىرنەشە كۇن بويىنا بومبالاپ, كاددافي اسكەرىن قاۋسىرىپ بارىپ قولعا تۇسىرگەن قارۋىمەن تريپوليگە 50 شاقىرىمدايعا تايانىپ قالدى. ۇلىبريتانيا باستاعان بىرقاتار ەلدەر كاددافي بيلىكتەن كەتكەن سوڭ, قارۋلى قاقتىعىس توقتاعاندا جاسالاتىن ىستەردىڭ «جول كارتاسىن» جاساپ ۇلگەرگەن. The Wall Street Journal مالىمەتىنە سۇيەنسەك, بريتان مينيسترلەرى بۇل جولى يراك ىسىنەن ساباق الىپ, ەلدەگى ءتارتىپتى قالپىنا كەلتىرۋدە كاددافي پوليتسياسى مەن اسكەرىن قولدانباق كورىنەدى. ال ليۆيالىق كوتەرىلىسشىلەردىڭ دە ءوز جوسپارلارى بارعا ۇقسايدى. ۇلتتىق وتپەلى كەڭەستىڭ اعا لاۋازىمداعى مۇشەسى فاتحي بادجانىڭ ايتۋىنشا, كاددافي بيلىكتەن كەتكەننەن كەيىن ەلدە ۇلتتىق كونگرەسس قۇرىلاتىن كورىنەدى. ول ەلدەگى ۋاقىتشا ۇكىمەتتى جاساقتاپ, كونستيتۋتسيانىڭ جوباسىن جاساۋمەن جانە ەلدە سايلاۋ وتكىزۋ جۇمىستارىمەن اينالىسپاق. احمادينەجاد بيلىكتەن كەتۋى مۇمكىن پرەزيدەنت سايلاۋىنان كەيىن ونىڭ قورىتىندىسىنا قارسىلىقتارىن ءبىلدىرىپ, كوشەگە قانشا حالىق شىقسا دا بيلىگىن ساقتاپ قالعان احمادينەجاد ءوزى سەنگەن كەڭەسشىسىنىڭ سىبايلاستىق ارەكەتىنىڭ سالدارىنان قولىنداعى تىزگىنىنەن ايىرىلۋ قاۋپى بار دەگەن اقپارات تاراۋدا. ونىڭ ەسفەنديار راحيم ماشاي اتتى كەڭەسشىسى ەكى بىردەي ءمينيستردى قىزمەتتەن كەتۋگە ماجبۇرلەگەن. يراندىق ساياساتكەرلەر قازىرگى كۇنى بولاشاق ەل پرەزيدەنتى كىم بولادى دەگەن بولجامدار جاساۋدا. ءبىرازى سىرتقى ىستەر ءمينيسترى ءالي اكبار سالەحي بولادى دەپ جوبالاۋدا. وتكەن اپتادا راحيم ماشايدىڭ جانىنا ەڭ جاقىن جۇرگەن ءۇش ادامى تۇتقىندالدى. بۇل جايىندا احمادينەجاد ەش تۇسىنىك بەرگەن جوق, دەپ جازادى اقپارات كوزدەرى. تۇڭعىش رەت ايەل باسشى كەلدى حالىقارالىق ۆاليۋتا قورىنىڭ تاريحىندا تۇڭعىش رەت ونىڭ باسشىلىعىنا ايەل ادام كەلدى. ول – فرانتسيانىڭ بۇرىنعى قارجى ءمينيسترى كريستين لاگارت. جانە ءبىر عاجابى – لاگارت حانىم كاسىبي ەكونوميست ەمەس كورىنەدى. الايدا ىسكەر ايەل ءۇشىن بۇل قارجى ءمينيسترىنىڭ پورتفەلىن دە, حۆق-نىڭ باسشىسى قىزمەتىن اتقارۋىنا دا كەدەرگى بولماي شىقتى. ەندى 55 جاستاعى كاسىبي زاڭگەر, شەبەر ديپلومات لاگارت حانىم گرەكياداعى ەكونوميكالىق قيىندىقتاردى شەشۋمەن قاتار, ءوزىنىڭ الدىندا بولعان توراعا دومينيك ستروسس-كاننىڭ ايەل زورلادى دەگەن ايىپ تاعىلۋىنا بايلانىستى ۆەدومستۆو ىشىندەگى داۋلاردى شەشۋىنە تۋرا كەلەدى. تابيعات مىنەزىنەن تونگەن قاۋىپ اقش-تىڭ وڭتۇستىگىندەگى لوس-الاموس ايماعىنداعى ورماندارداعى قاۋلاعان ءورت پەن ميسسۋري وزەنىنىڭ ارناسىنان شىعىپ كەتۋى «فورت كالحۋن» اتوم ستانساسىنا قاۋىپ توندىرۋدە دەپ جازادى Tageszeitung. الايدا, يادرولىق رەتتەۋ كوميسسيانىڭ جەتەكشىسى گرەگوري ياتسكو «اسا ءتونىپ تۇرعان قاتەر جوق, يادرولىق ماتەريال قاۋىپسىز جەردە ساقتالۋدا» دەگەن مالىمدەمە جاسادى. دەگەنمەن, لوس-الاموس تۇرعىندارىن ءورت ءسوندىرۋ قىزمەتى قاۋىپسىز جەرلەرگە كوشىرىپتى. نەاپولگە ايىپ سالىنۋى مۇمكىن ەۋرووداق نەاپول قالاسىنىڭ كوشەلەرىن قوقىس باسىپ كەتۋىنە بايلانىستى ايىپ سالامىز دەيدى. بۇل جايىندا ەۋروكوميسسار يانەز پوتونچيك مالىمدەگەن. «ەگەر جاعداي بۇدان ءارى جوندەلمەسە, يتاليا قارجىلىق كومەك الماق تۇگىل, ايىپ تولەيتىن بولادى. مەن نەاپولدەگى جاعدايدى قاداعالاپ وتىرمىن. ادەيىلەپ نەاپولدەن ازىرلەنگەن تەلەحابارلاردى كورەمىن. قالا تازالىعى بۇرىنعىسىنان دا جامان كۇيدە», – دەيدى كوميسسار.
ينتەرنەت ماتەريالدارى نەگىزىندە ازىرلەندى.