قازىرگى كەزدە ءىرىلى-ۇساقتى باسپالار نارىق زاڭدىلىعىمەن جۇمىستارىن جالعاستىرۋدا. دەسەك تە ماشاقاتى جەتىپ, ارتىلاتىن سالادان تابىس تابۋ وڭاي ەمەس. وسىنداي ىرگەلى ىستەرمەن اينالىسقان تالعار اۋدانىنداعى «Intellservice» كومپانياسى ماقساتىنا جەتۋ ءۇشىن مەملەكەت تاراپىنان قولداۋ تاۋىپتى. ۇجىم قازاقستانداعى باسپادان شاعارىلاتىن ونىمدەردىڭ 30 پايىزىن دايىنداۋدى العا قويعانى تەگىن ەمەس.
تاۋەلسىزدىگىمىزبەن قۇرداس ءوندىرىس ورنى وتكەن جىلى «دامۋ» قورى بەرگەن قارجىعا قوسىمشا تسەح سالىپ, گەرمانيادان اكەلىنگەن 8 ستانوكتى ورنالاستىرۋدا. جاڭا قوندىرعىنىڭ ەرەكشەلىگى ءبىر مەزەتتە قاعازدىڭ ەكى بەتىنە سۋرەت باسىلىپ, شىعارىلاتىندىعى.
– «بيزنەستىڭ جول كارتاسى-2020» باعدارلاماسى ارقىلى قارجىلىق قيىندىقتاردان قۇتىلدىق. بۇل باسپادان شىعاتىن ءونىم كولەمىن ارتتىرۋعا مۇمكىندىك بەردى. ياعني, تاپسىرىس كولەمى ۇلعايعاندا جۇمىسشىلار قاتارى دا وسەدى. بولاشاقتا 150 ادام جۇمىسپەن قامتىلادى, – دەيدى «Intellservice» كومپانياسى ديرەكتورىنىڭ ورىنباسارى ەركىن تىلەبالدين سەنىممەن. قازىرگى كەزدە باسپادا 350 ادام ەڭبەك ەتەدى. ولار نەگىزىنەن تالعار قالاسىنىڭ تۇرعىندارى. ءارى ايلىقتارى 70 مىڭ تەڭگە كولەمىندە.
– وسىندا ەڭبەك ەتكەنىمە 6 اي بولدى. كاسىبىمە ماشىقتاندىم. جانە كۇندەلىكتى جۇمىسقا ارنايى اۆتوكولىكپەن تاسىمالدايدى. تاماقتى دا وسىنداعى اسحانادان ىشەمىز, – دەيدى گ ۇلىم اكىمبەكوۆا.
قاعازدىڭ بارلىق تۇرىنەن ءونىم شىعارۋعا باعىتتالعان كاسىپورىن مەملەكەتتىك تاپسىرىس بويىنشا دا جۇمىس ىستەيدى. جىل سايىن 300 مىڭ دانا كىتاپ باسىپ, حالىقتىڭ رۋحاني كەمەلدەنۋىنە دە ۇلەس قوسۋدا. كەلىسىم شارتپەن ءوز ونىمدەرىن رەسەي نارىعىنا شىعاراتىنى تاعى بار.
قازىرگى «Intellservice» كومپانياسى قازاقستان نارىعىنداعى قاعاز ونىمدەرىنىڭ 20 پايىزىن قامتىپ وتىر. الداعى كەزدە ونى 30 پايىزعا جەتكىزۋ كوزدەلگەن. سونىمەن قاتار باسەكەگە قابىلەتتىلىكتەرىن شىڭداپ, جوعارى ستاندارتقا ساي جۇمىس ىستەۋدى ماقسات ەتكەن ۇجىمنىڭ ەل تاۋەلسىزدىگىنىڭ مەرەيىنە دەگەن تارتۋلارى قوماقتى.
كۇمىسجان بايجان,
الماتى وبلىسى.