7-9 شىلدە كۇندەرى بۋەنوس-ايرەس قالاسىندا ارگەنتينا مەن قازاقستان قۇرامالارىنىڭ اراسىندا وتەتىن دەۆيس كۋبوگىنىڭ شيرەك فينالىندا كەزدەسەتىن تەننيسشىلەردىڭ ەسىمدەرى بەلگىلى بولدى.
بۇل ماتچقا قازاقستان ساپىندا اندرەي گولۋبەۆ, ميحايل كۋكۋشكين, يۋري ششۋكين مەن ەۆگەني كورولەۆ شىقسا, الاڭ يەلەرىنەن بىزگە قارسى حۋان يگناسيو چەلا, حۋان مارتين دەل پوترو, داۆيد نالبانديان مەن حۋان موناكو وينايدى. ءبىزدىڭ قۇراما جاقىندا وسى جاۋاپتى سىنعا دايىندالۋ ءۇشىن وڭتۇستىك امەريكاعا اتتانىپ كەتتى.
بۋەنوس-ايرەستە وتەتىن شيرەك فينالدىق كەزدەسۋ 14 000 ادامعا ارنالعان «Pargue Roca» ستاديونىندا وتەدى. 7 شىلدە كۇنى جەكەلەگەن كەزدەسۋ وتسە, كەلەسى كۇنى تەننيسشىلەر جۇپتاسىپ ونەر كورسەتەدى. ال سوڭعى كۇنگە تاعى ەكى كەزدەسۋ جوسپارلانىپ وتىر.
جانكۇيەرلەر دەۆيس كۋبوگىنىڭ شيرەك فينالىن استانا ۋاقىتى بويىنشا «ەل ارنا» تەلەارناسىنان 7 شىلدە كۇنى ساعات 20.00-دە, 8 شىلدەدە ساعات 21.00-دە, 9 شىلدە كۇنى ساعات 20.00-دە كورە الادى.
قازىر قازاقستان قۇراماسى دەۆيس كۋبوگىنىڭ رەيتينگىسىندە 12 ورىنعا ورنالاسسا, ارگەنتينا الەمدەگى ەڭ ۇزدىك بەس ەلدىڭ قاتارىنا كىرەدى. ال تەننيسشىلەرىمىز الەمدىك رەيتينگىدە مىناداي ورىندا تۇر. اندرەي گولۋبەۆ اتر تىزىمىندە 44 ورىندا بولسا, ميحايل كۋكۋشكين 58 ورىندى يەلەنۋدە. يۋري ششۋكين جاقىندا گەرمانيانىڭ ماربۋرگ قالاسىندا ءوتكەن حالىقارالىق «چەللەندجەر» ءتۋرنيرىنىڭ سەرياسىندا تۋرنيردىڭ ءبىرىنشى راكەتكاسى البەرتو راموستان (اتر رەيتينگىسىندە 100 ورىندا) ەكى سەتتە جەڭىلگەن سوڭ 137 ورىننان 140 ورىنعا ءتۇسىپ كەتتى.
دەۆيس كۋبوگىنىڭ شيرەك فينالىندا بىزدە باسقا شۆەتسيا مەن سەربيا, اقش پەن يسپانيا, گەرمانيا مەن فرانتسيا قۇرامالارى كەزدەسەدى. ويىنداردىڭ ءبارى ءبىرىنشى اتالعان ەلدەردىڭ كورتتارىندا وتەدى. تاعى ءبىر ايتاتىن نارسە, الەمنىڭ ءبىرىنشى راكەتكاسى رافاەل نادال ۋاقىتىنىڭ تىعىزدىعىنان تۋرنيرگە قاتىسۋدان باس تارتىپ وتىر. ونىڭ ورنىندا يسپانيا قۇراماسىندا داۆيد فەررەر, فەرناندو ۆەرداسكو, فەليسيانو لوپەس پەن مارسەل گرانولەرس قاتىسادى.
ەلىمىزدىڭ باس كومانداسى ارگەنتيناعا اتتانعاندا ۇلتتىق قۇرامانىڭ بولاشاق مۇشەلەرى استانادا تەننيستەن جازعى قازاقستان چەمپيوناتىن وتكىزۋدە. 27 ماۋسىم كۇنى باستالىپ, 2 شىلدەگە دەيىن جالعاساتىن چەمپيوناتقا استانا, الماتى, قاراعاندى, پاۆلودار, شىمكەنت, اقتوبە, اتىراۋ, تالدىقورعان, سەمەي, وسكەمەن مەن تارازدىڭ تەننيسشىلەرى قاتىسىپ, جۇلدە قورى 10 000 اقش دوللارىن ساراپقا سالۋدا.